المرة دي واجب..

بداية أعتذر اليوم عن قطع سلسلة القصص بهذا البوست ولكنه طلب من مدونة عزيزة جدا وصديقة أحببت تلبيته.. والتدوينة القادمة بإذن الله قصة اسمها صحفي أون لاين..خليها لوقتها بلاش أحرقها..

الطلب الي جالي كان من الأخت أنجل مدياني واجب بتقولي حلو..أنا مصدقت على الله خلصت مدرسة عشان أرتاح من الواجبات بس خير تكرم عيونك يا ستي..

الواجب هو سؤال بيقول : اذكر 16صفة عن نفسك..؟ ولو ان السؤال صعب شوية بس هحاول أجاوب ومتخدوش كلامي على انه مدح في نفسي أو ذم في نفسي بردو ..أنا هتكلم بصراحة مطلقة..

الصفات 16هي..

1)رومانسي جدا جدا جدا وتعبان قوي مع الحب اليومين دول..لدرجة اني لما بقعد لنفسي بأبكي فعلا..

2)مش بحب حد يرفضلي طلب ولو كان بزعل قوي بس مش ببين بقول كل واحد براحته..

3)مش بحب حد يفرض علي شيئ أنا مش عاوزوه ولما بيحصل من أهلي في البيت بعمل الي هما عاوزينوه على مضدد (يعني وأنا مخنوق وهطق)

4)بحب الكتابة جدا خاصة الخواطر الشخصية والقصص..وبعشق القراءة قوي خاصة كتابات المنفلوطي وعلي الطنطاوي والرافعي..

5)مش عصبي إطلاقا ..بحب الخلوة بنفسي كتير وبتعب جدا لو حد قطع علي حبل أفكاري..

6)متفاهم ومش بحب أعاند مع حد حتى لو كان غلطان لإن الجدال مش من طبعي..

7)بحب أتكلم وأحكي كتير ونفسي حد يسمعني ...

8)بلاقي نفسي وأنا واقف ع البحر .. براجع صفحتي وأنا هناك..

9)أكتر حاجة تسعدني إني أحس بسعادة إنسان أو إنسانة أكون أنا السبب فيها..

10)أكتر حاجة تزعلني لو حد خاني..فعلا بغضب بشدة وساعتها بعمل عجايب(ربنا يكفيكم شر الخيانة)

11)بحب مهنة الصحافة جدا وبمارسها اليومين دول كصحفي بيتدرب يعني.

12)معنديش أصدقاء كتير يمكن كمان مفيش حد أعرفه أقدر أقول عليه صديق.

13)بحب الخروج والسفر وبكره الوحدة تماما ..

14)بأتمنى شيئ في نفسي كده لو حصل هأكون أسعد إنسان في الدنيا ولو لا قدر الله مش هأكون أتعس إنسان لإني هأكون متت خلاص وانتهيت.

15)مش بحب أزعل حد مني أبدا مهما كان حتى لو علاقتي بيه عادية جدا

16)بيعجبني رأي الناس بس مش بوقف حياتي عليه الحلو بتأكد منه بيني وبين نفسي والوحش بدور عليه في نفسي لو كان بغيروا مكنش يبقى رأي لا قدم ولا أخر..

طبعا زهقتم مني

معلش التدوينة الجية هتعجبكم إن شاء الله..

معلش الكلام المرة دي بلدي خالص بس يلا خير خير..

أنتظر آرائكم ع الواجب ده..ياترى حليتو صح ولا هأصقط في الإمتحان..

تحيتي..

13 التعليقات:

norahaty يقول...

السلام عليكم
ورحمة الله وبركاته
كلهااشياء جميلة فى الحقيقة لكنى اجد بعض المتناقضات (وهذا بعضآ من صفاتنا الانسانية )حتقول مثل ايه؟
مثل تحب الهدوء ولكنك تكره الوحدةمثلآ فوجود احدآ الى جوارى معناه وجود ضوضاء ولو صغيرة الى جوارى
وانك تحب الخروج والفسح والسفر وتحب الهدوء ايضآ
كيف ياصديقى المدون؟
اقولك احببت ان اعلق على كلامك وان اقول لك صباح الخيرات
وان اكون اول تعليق اليوم(يافرحتى يافرحتى يافرحتى)
اضع التعليق قبل ان يسبقنى احد
تقبل تشكراتى لكلامك الجميل فى مدونى امس.
ولى تعليق على تدربك على الصحافة ولكننى اؤجله لبعد حين.
تشكرات افندم.

ست البيت يقول...

متأكد انك بتتكلم عن نفسك؟
لم أقصد شيء أنا جل ما قصدته أنك تجمع صفات غريبة شوية الجميع اليوم عصبي لأتفه الأسباب لا يريد أن يرضخ لأحد في مناقشة عندي على الفاضية والمليانة
كثير الأصدقاء وغن سألته يقولك ماليس أصدقاء
جراة تحسد عليها قدرت تتكلم عن نفسك

ANGEL يقول...

كاتب مصري

كاتبنا العبقري
أنا طبعا في الأول بعتذر أني خليتك تقطع سلسلة القصص الجميلة إلا أنا من عشاق قرأتها ..
وثانيا أحب أشكرك من كل قلبي أنك مكسفتنيش ولبيت طلبي

...

نيجي بقى لصفاتك ..
بصراحة بصراحة
كلها عجبتني .. اما بالنسبة في اللي نفسك أن ربنا يحققهولك فربنا يحففلك كل اللي تتمناه يارب وتعيش حياة سعيدة وكما يرضاها الله لك وألف بعد الشر عليك من الموت

أشكرك مرة أخرى ومتتأخرش علينا في صحفي أون لاين
أوك
سلام
Angel Love

مسلم يقول...

امممممممم
نفس السؤال الطويل اللى الكل بيفضل يتكلم عن نفسه
انا زى ما قولت قبل كده فى احد المدونات اصعب شىء ان الواحد يحاول يوصف نفسه
هتلاقيه عمال يتلغبط
زى مانت عملت كده وبقى فى شوية متناقضات فى كلامك زى ما تفضل norahaty
وذكرها
بس مجهود كويس
كسبت شرف المحاوله
وعموما اللى قولته عن نفسك بيبين ان شخصيه تستحق الاحترام
تحياتى
علاء

samamasr يقول...

ربنا يوفق حضرتك ان شاء الله دايما

سنووايت يقول...

اجابات معظمها متوقعة من كتاباتك اللي بتعكس حاجات كتير في شخصيتك
شكرا للواجب اللي اتاح لنا فرصة التعرف عليك اكتر

fire bird يقول...

عارف
فيه اسئلة لو كنت انا اتسالتها
كنت هجاوب نفس اجاباتك
زى السؤال رقم 4-9-15
........................
قرات باقى موضوعاتك
كثير منها اعجبنى
اعجبنى هذا الاسلوب السلس المتناغم
..............................
شكرا على زيارتك مدونتى
سعيدة بمرورى بين شذى الكلمات
ارق تحياتى

momken يقول...

ماشاء الله
الواجب جميل
واجاباتك تدل على فكر عميق وثقافه عاليه
انت حد واعى ومتفتح
واجاياتك جميله جدا


تحياتى

غمض عينيك يقول...

حلوة صراحتك دي رغم ان السؤال يبان صعب لناس كتير بس انت حليته بصراحة وببساطة
اتشرفت بزيارتك لمدونتي يافندم وشرفت بزيارتي لمدونتك

تحياتي
محمد سمير

rovy يقول...

لسلام عليكم
الواجب واضح انه صعب .. لكن انت جاوبت بمنتهى البراعه ..
صفاتك جميله و لو انى ضد صفة مش بحب حد يرفض لى طلب ..لكن ده معناه انك انت كمان مش بترفضطلب حد يعنى الموضوع كده صعب .. باقى الصفات تمام التمام ..

دمت بخير و سعاده و سلااام
تحياتى
rovy

rara يقول...

السلام عليكم ورحمة الله وبركاته
انت بجد شخصية جميلة ورومانسية
وده من قبل ما تتكلم عن نفسك
لأنه واضح من كتابتك
ربنا يوفقك ويكرمك ماتتمناه

تحياتى

أليس في بلاد العجائب يقول...

السلام عليكم ورحمة الله وبركاته :)

فيك حجات كتيرة قلتها عندي منها :) فكرتني بحكاية مش بحب الجدال علي الفاضي و مبحبش حد يكون زعلان والوحدة بالرغم من وجود بشر حوليك :)

اجاباتك جميلة زي قصصك .. ربنا يزيدك و يحققلك كل امانيك ان شاء الله ويرضيك بقضائه :)

غير معرف يقول...

احسن شئ في كلامك عن نفسك الرقم عشرة((((10))))ياريت الكل يقراة بجد عمرك ماعملتة في حياتك ثم انك بتتكلم عن نفسك كانك ملاك نازل من السما والمادح في نفسة كداب وزي ماقالت(norahaty)في تناقض في وصفك لنفسك لانك عايز تتطلع في احسن صورة وانت في الاساس مش كده ابدا--المخلصة اليك سابقا((؟))

 
') }else{document.write('') } }